لنفسك عليك حق
كملنا سنة ونص على عقدنا 
و10 شهور على زواجنا
الحمدلله على كل حال .. وضعنا ترتب ووضع اي انسانة متزوجة لازم يترتب خلال سنة
لو ماترتب معانته فيه خلل في علاقتهم
لكن اللي بتكلم عنه اليوم هو شي خاص لنا احنا بنات حواء وحق من حقوقنا
المصروف الشهري
هذا حق فرضه لنا الشرع ومو من حق اي زوج يحرم زوجته من المصروف
اذا ماكان يعطيها كل شهر مبلغ فـ مايبخل عليها بأي شي تطلبه منه
فيه ازواج يقولون مابعطيك مصروف شهري لكن بالمقابل اي شي تطلبيه تحت امرك
وفيه ازواج يعطون مصروف شهري لكن بالمقابل ماله اي دخل تطلبيه بعدها
وفيه الوسط يعطيك مصروف وان نقص عليك شي يكمل لك
النوع الأول مايعجبنا ومو مرغوب فيه .. ليه ؟
لأنه ممكن تطلبي في يوم مبلغ ويقولك ماعندي او الحين آخر الشهر انتظري ينزل راتبي واعطيك
لذلك لازم تتفقي معاه على مبلغ مناسب لميزانيتك وميزانية زوجك ينصرف لك كل شهر اريح لك وله
النوع الثاني مقبول لكن ممكن ننزنق ونطلب زيادة
زي مثلا مقاضي العيد او زواج قريب من قرايبنا .. ممكن مصروفنا مايكفينا وان طلبتي طار فيك !
هنا انتي وذكاءك .. ممكن توفري من مصاريف الشهور اللي فاتت وتكملي عليها باللي يعطيك
او تتفاهمي معاه ان هالمبلغ ممكن يزيد لو احتجت منك وانت حبيبي اكيد ماراح تبخل على حياتك وعمرك
النوع الأخير ماعليه عيوب ابدا 
بالنسبة لك كـ امرأة متزوجة انتي حرة نفسك
مو حلوة كل ماتبغين شي طلبتي .. كذا كأنك لسى في بيت ابوك
انا كنت كذا الين طلعت بطاقة صراف وارتحت مرااااا
كل وحدة تطلب مصروف حسب ميزانية زوجها بحيث ماينزنق ولا يتسلف ولا يقعد طفران
خليك في هالشي مرنة .. لكن بنفس الوقت لاتظلمين نفسك 
الربوع اللي فات جو صحباتي عندي وفضفضت لهم
هزئوني 
ليه .. لأني ساكتة عن حقي والأخ تعود على سكوتي فـ صار مصروفي علي انا
بالبداية كنت اراعي ظروفه وكذا لكن ابو الشباب استحلى الشغلة وعجبه الحال .. وتهزأت الين شبعت
حتى لو كان زوجك مزنوق لازم يعرف انه متزوج وزوجته ملزومه منه
اذا عندك دخل غير مصروفك من زوجك خليه لنفسك
نفسك ثم نفسك ثم نفسك
محد نافعك غير نفسك واللي وفرتيه لنفسك وبس
واذا زوجك يعطيك مصروف زايد عن حاجتك برضو خليه جزء منه لنفسك
افتحي لك حساب ووفري فيه بدون لايدري
ترا مو لازم كل ماسوينا شي لازم نقول لأزواجنا
ياما عندهم بلاوي وماقالو لنا ولاحيقولو لنا اصلا
مو ضروري حساب
اشتري حصالة وحطيها في مكان مايشوفه او حطيها في بيت اهلك وجمعي فيها
ماتدري عن الدنيا كيف ولا الحال كيف حيكون
عشان كذا عيشي لنفسك وبس
ارضي زوجك لكن مو لدرجة انك تكوني عبده مستعبده منه
زي ماله حق انتي كمان لك حق
رمضان داخل علينا لاتهلكين نفسك بالطبخ وابو الشباب بس يجي ياكل ويمشي
اتصرفي بذكاء .. فرزني .. اشتري مفرزنات .. رتبي جدولك
بحيث ماتتعبين نفسك وترهقينها .. وتخلين لك وقت ترتاحين فيه
زوجك ماله حق في مصروفك فيه طيرتيه وايش باقي منه
هالشي اعاني منه حاليا لكن بس انتظر الفرصة عشان اناقشه ان هالشي غلط ومصروفي وانا حرة فيه مالك حق تدور وراي
كمان نقطة انا اكرهااااا في بعض المتزوجات
مجرد ماتتزوج تتخلى عن صحباتها .. تسأليها ليه تقولك زوجي مايحب ازور احد غير اهله واهلي !!!
سلامات يالحب 
اوكي احترمك واحترم رأيك .. لكن مالك حق تمنعني ازور صحباتي
يعني حضرتك عادي تروح وتجي عند فلان وعلان وانا لا !!
والمصيبة ترضخ لأمره وتوافق 
انتي بكذا خليتيه يصيطر على حياتك ويتملكك وهالشي ماله حق فيه
ولا مثلا يقولك زوريها لكن نص ساعة انتظرك فيها تحت تزورين وتنزلين !!
بلاها روحة اصلا اذا فيها مذلة كذا
او مثلا روحي الزواج ساعة وتخرجين !!
لو عنده دوام ومحد يرجعك بقول ايوة معاه حق ومالك حق انتي تضغطين عليه وتسهرينه ويروح تعبان وتصير له مشاكل بدوامه بسبب زواجك
لكن كذا عباطة .. لاياحبيبي كذا تجهزين له صينية شاهي وتتربعين وتقولين شوف يابن الناس ................... الخ
او مثلا تجيك وحدة شخصيتها قبل الزواج تجنن لكن بعد الزواج غيييييييييييييييييير
ليه يابنتي مسويه بنفسك كذا ؟؟
عشان مين مغيره شخصيتك وملابسك وشعرك ؟؟
تبغي تلبسي على كيفه البسي في بيتك عشان نفسه يعني لكن تبهذلي نفسك قدام الناس عشانه
لا ياعمري شخصيتك ولبسك وشعرك واصلك وترتبيتك لاتغيرها عشان احد مين ماكان
لاتفتحي عيونه على عيوبك ولاتكوني كتاب مفتوح له يعرف كيف يدخلك ويكسب رضاك وانتي زي الهبلا تخرين كل شي له
ولا تخليه يهينك او يتمسخر فيك او يقلل من شخصيتك .. وقفيه عند حده لكن باحترام وتعاملي معاه بأصلك
بحيث ينحرج من تصرفاته
مثلا : مرا دخل عندي وقالي يابت الستاير اعطيها اهتمام ونظفيها
قلت له على اساس عندي سلم انظف فيه الستاير وغيرها
انخرس
ومرا كنت اتصفح حساب ابشتري ساعة قالي اشتريلي معاك .. قلت له على اساس انت ميت على الساعات
ساعة الملكة مرمية في الدرج مالبستها 
قالي عادي انا زوجك وجيبي لي .. قلت له جيب لي واجيب لك
قالي جبت لك احبار الطابعة حقك .. قلت له هذا شي ضروري وطبيعي تجيبه
عمرك جبت لي ساعة ولا شنطة من غير ما اطلب منك !!
ساعة بس وقالي خلاص اختاري لي ساعة واختاري لنفسك ساعة وقولي لي كم قيمتها
مهما كان حبك له وضحي له هالحب وخليه ملاك وكل حياتك
لكن بينك وبين نفسك اعطيها حقها ولاتهمليها وعيشي لنفففففففففففففففسك
اللله يسعدك ويوفقك والله انك راحه والازواج الي زي كذا ابد ما اتنا قش معاهم اروح اقول لابويه انا شارطه من قبل الزواج عليه
ردحذف