زوجك على ماتعوديه
السلام عليكم
صباح الخير للجميع 
اليوم انا في قمة روقاني ونشاطي .. قلت انزل بوست جديد وافضفض افضفض افضفض الين خلاص
البوست هذا بيكون عن الزوج والتعامل معاه ( مع اني قبل تكلمته عنه بس دحين عن واقع تجربة 10 شهور )
قبل ابدأ بحط عنوان كبييييير
( زوجك على ماتعوديه )
من هالعنوان تقدرين تتعاملي معاه ومع حياتك وتتكيفي معاها
اذا زوجك مايحب يخرج زي زوجي ولا يحب الأسواق والتمشيات وكذا معليش انتي ماراح تقضين حياتك بين 4 جدران !!
وطبعا صعب كل مارحتي لأهلك خرجتي معاهم .. فين زوجك !؟؟
خليته يتعود كل سبت نخرج نتمشى او نتسوق .. حتى لو ماله نفس غصب يخرج هههههه
طبعا قبل كل هذا لازم الأسلوب الحلو والدلع والهبالات هههههههه
زوجي مايحب السوق ويتعب من الفرفرة .. لكن قلت له مالي غيرك حمودي يخرجني
مع فيس حزين وكذا وخلاص مشي الموضوع 
حاليا اعاني من مشكلة انا تسببت فيها مع الأسف وزوجي المليح تعود على هالشي وخلاص على باله انتهى الموضوع
لا ياحبيبي تراني انتظر اللحظة اللي انفجر فيها بس اصبر ههههههه
تعود على الإهمال وانه فيه وحدة وراه تغطي على اهماله هذا وتسكت
بالبداية الغسالة .. كنت اريحه واخفف عليه المصروف واغسل الملابس في بيت اهلي وطبعا الحال عجبه 
بعدين قررت وقلت ملابسك تغسلها شغالتكم وملابسي ادبر نفسي
راح يومين وتعب .. قالي انحرجت من امي !!
يعني انا وجهي مغسول بمرق ماني مستحية من اهلي وانا انشر ملابسي قدامهم
وقرر يغسلها في البيت .. قلت موافقة لكن بشرط انت تغسلها بيدك
يدي توجعني وانا اعصرها بيدي .. قال طيب
وكنت هبلا لمن وافقت لأنه بكذا ارغمني على غسل الملابس في البيت بدون نشافة !!!
اخر شي قررت وقلت ملابسك تغسلها بنفسك وتنشرها كمان
وكمان ملابسي معاهم ولا تكرم وجيب غسالة زي الأوادم
اخر الشهر جاب غسالة وريحتني الحمدلله 
ناس ماتجي الا بالعين الحمرا
دحين اللمبة خربانة حق المطبخ .. ماسويت له فطور قالي شغلي الكشاف واشتغلي 
سويت فطور وآمنت بالله لكن الغدا لو يفحط ماسويته بالكشاف
لأن لو سكت وسويت بالكشاف بقعد شهر على الكشاف ولا جاب لمبة ويمكن اكمل سنة كمان 
..............................
كمان فيه شي لازم تنتبهين له وهو لاتدلعينه بزياااااااااادة ترا تندمين والله
يتعود على الدلع وخلاص ممكن مايبادلك هالشي ويعتبر انك قايمة بالواجب زيادة وانك ماراح تزعلين لو ايش ماسوى لأنك مدلعته
دلعيه ماقلنا شي لكن بالمعقول وخلي لك شخصية في البيت يحترمها ويقدرها ويعمل لها ألف حساب
طبعا فرض الشخصية بالأسلوب مو الغصب والقوة وكلامي لازم اللي يمشي !!
لاياعمري لازم فيه مواقف تمر ضروري تسلكين له عشان الموضوع يلتم ومايكبر ويتحول لمشكلة
لكن من وراه سوي اللي براسك بدون شوشرة 
من وراه مو معناته تخرجين وتفلين امها وتغضبين ربك وتقولين ابفرض شخصيتي
كمان نقطة
كل رجال وله مدخل لقلبه تقدرين تاخذين اللي تبغين منه بدون زعل
ابحثي عن نقطة ضعف زوجك فين وادخلي منها واطلبي اللي تبغيه
او ناقشيه بموضوع انتي شايفته مهم لكن مانتي عارفة كيف تبدأين
ايامنا فيها الحلاوة وفيها المرارة
عيشي يومك لنفسك ثم لزوجك وبيتك
انتي شيء جميل وكلامك فيه طاقة إيجابية عجيبة الله يسعدك ويرزقك كل خير على النصائح الجميلة ويابخت زوجك فيكي ماشاء الله احسك عاقلة واهم شيء قنوعه ومن اهم النصائح ابتعدي عن المقارنة اقصد لاتقولي اشمعنا اختي او فلانة زوجها غني او من ذا القبيل مااقول لا تستفيدي من تجاربهم بس بعقل حبيت أضيف ذي النصيحة ��
ردحذف