اسواق جدة للتجهيز

4:57 ص Ayca 0 تعليقات

امس على اساس انزل للسوق  لكن ربي ماكتب
وعلى طاري السوق .. قررت ادبش من دحين وعلى رواقة وهذا افضل شي عشان ماتشتري شي على عجل وتتحسفي عليه .

اسواق جدة ياكثرها بس الذكية اللي تعرف تختار السوق اللي يلبي كل طلباتها ويوفر عليها الوقت

للحين ماتحدد فرحي لكن برضو ابغى ادبش من بدري واختار الموديلات وانا مرووقة ومافي شي يشغلني والاهم من هذا كله 
اللي اشتريه حلبسه كثيييييييييير مو البسه اول شهر وبعدين ارميه لان موضته انتهت !!
او خلاص صار حق عروس ماينفع البس شي كبير ومليان تطريز ويبغالك شي انعم !!

ان شاء الله راح اكثر من التيورات وهذا الشي اللي ممكن البسه حتى بعد شهر من زواجي وممكن البسه بمناسبات كبيرة وممكن بزواجات 

فساتين السهرة تكفي 4 بالرااااااااااااااااحة ، لانك تملي منها وتبغي تغيري وحرام فستان بـ 1000 ينرمي 
عاد انا من النوع اللي احلل قيمة الشي اللي اشتريه ههههههههه

نتكلم على اسواق جدة :

مجمع العرب .. فيه كل الماركات وبالذات ماركات المكياج ( ماك ، فور ايفر ، انجلوت ، سنتربوينت اللي عندهم ماركة نكس وماكس فاكتر ، وجوه ، دبنهامز ) 
المجمع ماشاء الله كبيير وبصراحة اطفش فيه ومشواااااااااااااار بين المحل والبوابة
 
الصيرفي سمعت انه بيفتح محل باث آند بوي وهالماركة معروفة باللوشنات وكريمات الجسم والاحلى سعرها مرا معقولوعندهم محل اسمه خان الصابون او كنوز الطبيعة المهم انه محل صوابين يبيع صوابين طبيعية وعنده زبدة الشيا الاصلية .

الأندلس مول فيه ماركة انجلوت تقريبا محل كامل مو كشك تلاقوه عند بوابة 3 والدور اللي فوق عندهم فساتين بس انا ماتعجبني غالية على الفاضي

الجامعة بلازا عندهم فساتين سهرات ومحلات اكسسوار واغلب العروسات عندهم

برضو لمسات في حي البوادي جنب مركز الحجاز الدولي برضو مشهور بفساتين
 السهرات لكن اكسسوارات مرا مانصح احسها خاااااااااايسة نفس نظام الهنود اللي يبيعو في البسطات 

عزيز مول احبه هالمول كثييييييييييير فيه اشياء حلوة محلات اكسسوارات وشعر وفساتين بالدور الثاني موديلاتهم حلوة وناعمة

المساعدية : عندهم فساتين افراح وملكة حلوة زي محل رهيد المشهوربس هذا اسعاره اوفر تقريبا بـ 5000 او 8000 وممكن اغلى

كمان فيه شارع التحلية وجدة مول برضو فيهم ماركات ملابس ودبنهامز وفساتين افراح

الكندرة ، هالسوق شبه شعبي عندهم حاجات حلوة وتيورات تجنن بس لازم تنبشي على المحلات الحلوة فيه وكمان فيه مركز بن شيهون برضو في الكندرة عنده فساتين افراح اسعارها معقولة بس اخر مرا نزلته ماعجبني شي فيه والناس اذواق 

وكمان فيه العمارة الزرقا برضو في الكندرة خلوكم من الخياطين اللي فيه اطلعو للدور الرابع والخامس عندهم فساتين افراح تجنن موديلات جديدة وحلوة وعندهم نظام الايجار والشراء ، وكمان فيه محلات كوش ويعملو زفات وممرات ومداخل

وفيه محل اسمه السنديان يعمل مسكات تجنن زي ماتبغي بالضبط .
مكانه شارع الامير سلطان 

فيه كنز بجدة مرا ممتااااااااااااز وهو سوق ( البلد )
هذا لازم تمر عليه كل عروسة .. عندهم عطور نفس عطور فافافوم ووجوه وباريس غاليري بس بسعر مخفض 
وكمان ساعات ماركات عالمية وبرضو سعرها مخفض .. وكمان المكياج والفساتين 
هي عمارة في البلد بس مافتكر عمارة ايش اظن اسمها الباشا او عمارة الملكة 

مرا صحبتي تقول لقيت فستان في البلد وهذا الفستان لقيته في لمسات ونفسه بالضبط لكن السعر يختلف 
في البلد بـ 250 وفي لمسات بـ 800 !!!

 وكمان فيه كنز لاشياء الدبش وهو ( الخاسكية ) هذا سوق معرووف بجدة ومكانه جنب البلد
اشياءه حلوة زي صناديق التجهيز اللي تحطي فيها اغراض الحمام او النوم ..... الخ 
وعندهم اكياس الفساتين بأشكال مرا حلوة وعلى دانتيل وتل وتقسيمات المكياج والعطور 
اي شي ممكن يفيدك في تقسيم وترتيب جهازك تلاقيه عندهم وبسعر جدا بسيط 

وبرضو في الهنداوية فيه محلات السيف وبادريق حق الاواني المنزليه تفييدك اذا تبغى تاخذي صواني للتقديم وعندهم مباخر وتوابعها وصندوق السجادات



وسلامتكم