يوم اعلان الخبر للناس

11:54 ص Ayca 0 تعليقات

بعد الشوفة عدى تقريبا اسبوع على الموضوع
كنا ننتظر اتصال منهم عشان يحددو موعد للخطوبة الرسمية 
ومن بعدها نعلن الخبر للناس

مر اسبوع ولا دقو .. قلقنا مرا وجت وساوس براسي وبكا وحالتي حالة
وخالي يقولي اصبري بسأل عن الرجال تمام عشان تتأكدين اكثر .. شككني اكثر الله يسامحه


وجالسة على ناار بين تأكيد خالي وبين اتصالهم
حتى اني قلت خلاص شكله مافي نصيب وشلت الموضوع من راسي

لكن اتصلو وقالوا آسفين تأخرنا عليكم بس كان اخوي مسافر !!

المهم قالو تبون المهر مع الخطوبة ولا ننتظر الين يملكو ونجيبه مع الشبكة ؟
قلنا لهم مع الخطوبة نفس نظام اختها وبنات عمها ، 
و حددو موعد الجمعة 8 / 1 / 1434 هـ
كنا صايمين وجهزنا السفرة بس مافطرو عندنا .. اصلا عادي فاتهم اللي سويته !!

المهم يومتها مطرت ، واذا نزل مطر بجدة مشكلة والكل يتخبى ببيته
قلت حظي نحس خلاص مو جايين ، وعلى طاري المطر .. على كل جية منهم ينزل مطربجدة او مكة

جا اتصال من اخته انا هنا قمطت وقلت اكيد بتعتذر
لكن خاب ظني الحمدلله وقالت اخواني بالطريق خلاص

اول ما جو غلطو في شقتنا .. احد يغلط بشقة خطيبته  !!
طبعا قزيته من العين السحرية وشفته من جديد
ماعلينا .. شرفونا وجلسو مع ابوي وسوالف وطلع ابوه يعرف نص جماعتنا وطلع صديق عمي المقرب

نص ساعة جلسو وخرجو .. وهم خارجين سلمو ابوي المهر















واعلنا الخبر للناس
هاللحظة من أجمل اللحظات ..
شفت الفرحة بعيون امي اللي كل ماسلمت عليها دعت لي
كنت انتظر هاليوم اللي اسمع فيه امي تبشر الناس بخطوبتي ويباركون لها .. فرحت عشانها كثيييير 
الله يسعدها ويطول بعمرها .. اكثر وحدة شايلة هم الدبش وانا معطيته سيفووون

واحتفلنا بالقروب















وبس