يوم الشوفة

11:26 ص Ayca 0 تعليقات

الجمعة 17 / 12 / 1433 هـ






















اتصلو قبلها بيومين عشان نتجهز وكذا .. 
يوم الخميس تهيأت نفسيا واستخرت وتوكلت على ربي
عصر الجمعة جهزنا الحلويات والقهوة والشاهي مع الموالح وطلع المحروس مايشرب شاهي !!

المهم الجماعة قالوا جايين العصر .. وجت 6 المغرب ولا جو
الوسواس لعب براسي .. اقول لاخواتي شكلهم سحبوا بس ماعرفو كيف يقولولنا
ومرات اقول صار شي بالطريق وخلاص هونو دحين يتصلو يعتذرو

الحلو في الموضوع انه كان يوم جمعة وآخر ساعة بالعصر دعيت من كل قلبي وايقنت ان الخير جايني بإذن الله

على أذان المغرب شرفو الحمدلله
وصلو المغرب عندنا .. جلسو وارتاحو بعد ربع ساعة دخلت سلمت عليهم
كنت مرا متفائلة ومافي اي توتر الحمدلله .. وجييهم جدا مريحة والحمدلله ماهم من النوع اللي يسأل اسئلة غبية
زي مثلا ايش تطبخي وليش عاملة شعرك كذا !!

والمريح في الموضوع كمان كانت معايا صديقة عمري على الجوال اعطيها الاخبار اول بأول واستشيرها ايش البس وكذا



















الساعة 7 كانت موعد الشوفة

جلس في الصالة وجنبه امه .. اخته كانت واقفة جنب الام ..
انا دخلت عليه وجلست في الكنبة اللي فيها جدته وعلى يساري اخته الثانية
حسيت نفسي بحصار ههههههههههههه

طبعا مايحتاج اقول انه طالع فيني بشكل دقيييييييييييييييييق جدا انا يدوب لمحته اول مادخلت
اخواته يقولون له كلمها وهو ساااكت بس يطالع وانا عيوني في الأرض بس الحمدلله كنت مرا واثقة من نفسي
وسألني سؤال بايخ : ايش اسمك !! 

جاوبته وطالعت فيه وقمت بعدها للغرفة .. كنت مرا مرتاااحة الحمدلله
دقايق كذا واخواته زغرطو وجت امه لبستني الخاتم ( علامة القبول )
وسلمو علي وباركو لي وامه كانت تبكي ياحياتي عليها

خاتمي بعد الزغاريد والبكا